Mapuche Nütram

5 Marimari kompuche. Iñche taHéctorMariano. Tañi tuwünGalvarinoche, tañi lofKurakoRankil pingey.Choyümngen ka tremün feychi lof mew. Tañi wünen dungu mapuzugun, feymew, tañi pichikalu re mapuchedungukefun. Rupalu kiñe müfü tripantu, konün kiñe wingka kimelwe ruka mew, feymew wüla, ñochikechi kimpun españoldungun. Tripan tañi mapu mew, mapu ñi duam, niewenoluam chew ñi küdawam, femngechi, küpan ta Santiago waria mew. Akulu faw iñche, rume kaley ta dungu. Kimpan mapuche, mapuche yom üy nielu ka kim mapuzugunolu. Feymew dungukelay ñi dungun mapuzugun mew engün. Ka femngechi, konpan Universidad mew ñi küdawal, ka pepan mapuche domo ka mapuche wentru rulpanolu ñi mapuzugun engün. Feymew, rakiduamün chumngechi kimelael tañi mapuzugun. Femngechi, fentren che katripachengelu ayüy tüfachi dungu. Ka fantepu mew, doy kaketripanche ketü, kürinkudungukelu, koreadungukelu, Brasil che, fillke pais küpalu chi pu weche mülepalu Universidad mew, koni engün ñi kimael mapuzugun. Welu chi pu che choyüngelu tüfachi pais mew, müte duamkelay ñi mapudunguael. Femngechi feley tüfachi dungu tüfachi pais mew, wüneyenielu tüfachi pais mew, duamlafi tüfachi mapuchedungun fentren tripantu. Welu fantepu mew wechekeche küpa kimi taiñ wünen mapunchedungun. Fantepu mew, “inchiñ taiñ dungu” piletuy engün ka. Ka femngechi, chew püle rume, kimelmekengey mapuzugun. Pu mapuche fillke tuwün nielu ka pu wingka ketü puwkey tañi kimael mapuzugun. Feymew, tüfachi waria mew fillke püle we kimngeketuy tüfachi mapuchedungun. Newe kimniengekenochidunguam feymew nentuiñ kiñe pichi lifru chumngechi taiñ kimelael ka dungultuael fantepu mew tüfachi we pu trem. Kimelmekengey tüfachi mapuzugun jardin mew ka fillke colegio mew, fantepu mew, asignatura pingelu. Welu kuyfi mew, chem awkantun rume, chem ayekan rume, chem piam, chem epew, chem nütram, ka fillke kom dungu, wiringekelafuy; kimniekefuy fillke dungu re dungun mew, re awkantun mew, feymew, kimelngekelafuy mapuchedungun kimelwe ruka mew. Famentuniengekefuy taiñ mapuchedungun fillke püle, kimelwe ruka mew, elungekelafuiñ ñi mapudunguael konpulu wingka kimeluwün mew. Prólogo Wüne llitun nütram: Taiñ ngüneduamael taiñ mapuzugun nütram mew